Калектывы народнай песні «Вяскоўцы» Дужаўскага сельскага клуба і «Землякі» з раённага цэнтра культуры і вольнага часу ўпершыню прынялі ўдзел у купальскім свяце «Александрыя збірае сяброў», што прайшло ў Шклоўскім раёне. «Вяскоўцы» у складзе мабільнай групы выступілі з 12 канцэртамі.
На гэтым тыдні сямейны калектыў «Світачы» і танцавальная група народнага калектыву «Забава» выязджалі з канцэртнай праграмай на свята Нептуна , якое прайшло ў пасёлку Гарадзішча Смаленскай вобласці.
Работнікі маладзёжнага культурнага цэнтра сумесна з тэатральнай студыяй «Каламбур» дома-інтэрната для ПНХ арганізавалі для дзяцей паказ спектакля «Снежная Каралева» і дыскатэку. Таксама прайшла гульневая праграма. Мерапрыемствы для цікавага адпачынку дзятвы ў час летніх канікулаў праводзяцца тут рэгулярна.
Ва ўрочышчы «Слоўтава» пачала работу трэцяя змена палатачнага лагера. На гэты раз тут адпачнуць 20 навучэнцаў з СШ № 2, для якіх будзе арганізавана шмат розных спаборніцтваў і забаўляльных мерапрыемстваў.
У Ваўкавіцкім сельскім Доме культуры адбылося свята «Купальскія забавы». Канцэртную праграму да яго падрыхтавалі дарослы калектыў «Івушкі» і дзіцячы — «Алёнушкі». Было шмат гульняў і конкурсаў, купальскіх персанажаў. З найбольш актыўных удзельнікаў мерапрыемства на завяршэнне была выбрана «Купалінка-2013»: ёй стала Лілія Панадысева, якой і ўручылі галоўны прыз.
Святы, прысвечаныя Купаллю, прайшлі і ў іншых культустановах раёна.
Сёння ў 18.00 на гарадскім стадыёне ў рамках чэмпіянату Магілёўскай вобласці па футболу адбу-дзецца матч паміж чавускай камандай «Ніва» і быхаўскімі футбалістамі. А ў наступную сераду, 17 ліпеня, у такі ж час пачнуцца спаборніцтвы па футболу на Кубак Магілёўскай вобласці з удзелам нашых спартсменаў і каманды Магілёўскага ўніверсітэта харчавання.